AMAC-ի յարգելի ընկերներ,
Լիբանանը ներկայիս խոր ճգնաժամի մէջ է. մեր հայրենակիցները, որոնք կ’ապրին այդ հողին վրայ, ուր շատերուս համար ժամանակին «տուն» էր, այսօր աներեւակայելի տառապանքներ կը կրեն: Ռմբակոծութիւններու մշտական վախը, համատարած գործազրկութիւնը եւ փակ դպրոցները շատ աւելի ծանրացուցած են արդէն իսկ սարսափելի իրավիճակը, որ սկսած է տնտեսական փլուզման եւ դրամատնային ճգնաժամի հետեւանքով: Վերջին ռմբակոծումները աւելի խորացուցած են 15-ամեայ քաղաքացիական պատերազմի անողոք հետեւանքները:
Լիբանանը, որ ժամանակին «Մերձաւոր Արեւելքի Զուիցերիան» կը կոչուէր, այժմ վերածուած է գոյատեւման համար պայքարող ժողովուրդի՝ աւերուած, աղքատացած եւ անորոշ ապագայով։
Նման խորունկ տառապանքներու դիմաց, Գանատայի Հայ Աւետարանչական ընկերակցութիւնը (AMAC) չի կրնար ձեռնածալ մնալ: Աստուծոյ սէրը մեզ կը մղէ եւ մեր կոչումը մեզ կը յորդորէ մեզ, որ անյապաղ գործենք, մատուցելով օգնութիւն մեր տառապող հայ համայնքին։
Որպէս եղբայրակցութիւն մեր սիրելի Լիբանանի հայրենակիցներուն, Գանատայի Հայ Աւետարանչական ընկերակցութիւնը (AMAC) Թորոնթոյի մէջ կազմակերպած է բարեգործական համերգ, որուն նպատակն է հաւաքել անհրաժեշտ միջոցներ՝ աջակցելու Լիբանանի հայ համայնքին: Միջոցառման ողջ հասոյթը ուղղակիօրէն պիտի ուղղուի Լիբանանի հայկական համայնքին: Հաւաքուած գումարին նշանակալի մասը պիտի օգտագործուի հայկական դպրոցներու պահպանման գործին, որոնք ոչ միայն կրթութեան կեդրոններ են, այլեւ փրկութեան յենարաններ են մեր հայոց մշակոյթին, ժառանգութեան եւ ապագայ սերունդներուն ինքնութեան պահպանման աղբիւրներ:
Համերգը տեղի պիտի ունենայ Նոյեմբեր 24 2024-ին Թորոնթոյի Հայ Երիտասարդական Կեդրոնի Համազգային Թատերասրահին մէջ (Hamazkayin Theater of the Armenian Youth Center — 50 Hallcrown Pl, North York, Ontario):
Այստեղ դուք կրնաք իրական փոփոխութիւն բերել: Անկէ անդին՝ ձեր ներկայութեամբ, հովանաւորելով կամ պարզապէս նուիրաբերելով, ձեր ներդրումը շօշափելի օգնութիւն կը դառնայ անոնց համար, որոնք ամենշատ կարիքն ունին: Հաւաքուած իւրաքանչիւր տոլար կենսական աջակցութիւն կը տրամադրէ ընտանիքներուն, երեխաներուն եւ դպրոցներուն, որպէսզի անոնք կարենան դիմակայել այս դժուարութիւնները՝ պահպանելով յոյսը, որ կը պարգեւէ Աստուած:
Կը խնդրենք միանալ մեզի՝ այս համերգը դարձնելու մեր եղբայրասիրութեան հզօր արտայայտութիւնը: Անոնց համար, որոնք չեն կրնար մասնակցիլ, մենք կ՛ողջունենք եւ խորապէս կը գնահատենք որեւէ գումարի նուիրատուութիւն:
Նուիրատուութիւնները կարելի է կատարել առցանց՝ այցելելով www.amacnews.org կայքէջը, կամ ուղարկելով check AMAC հասցէով՝ 11455 Rue Drouart, Montréal, QC, H3M 2S6, Canada: Կը խնդրենք յուշագրութեան տողին մէջ նշէք «Lebanon Crisis»։
Մենք խորապէս կը գնահատենք ձեր ներդրումը:
Թող Տէր Աստուած օրհնէ ձեզ առատապէս եւ ձեզ օրհնութիւն դարձնէ այս տառապանքով լի աշխարհին մէջ:
Յարգանքներով՝
