Շնորհակալութիւն Օնթարիոյի Հայութեան
Ընթացիկ տարուան Յուլիս 8-ին «Սիսիանի Բժշկական Կեդրոն» ՓԲԸ-ին, յանձինս տնօրէն Անիկ Գրիգորեանի, Գանատայի Հայ Աւետարանչական Ընկերակցութեան եւ Օնթարիոյի Հայ-Գանատական Բժշկական Ընկերակցութեան կողմէ ուղարկուեցան բժշկական պարագաներ, որոնք որպէս նուէր յանձնուեցան Սիսիանի Բժշկական կեդրոնին, Սիսիանի համայնքի բնակչութեան համար, Ամերիկայի Հայ Աւետարանչական Ընկերակցութեան Հայաստանի մասնաճիւղի կողմէ:
Ամերիկայի Հայ Աւետարանչական Ընկերակցութեան Հայաստանի մասնաճիւղի Սիսիանի գրասենեակի պատասխանատու Սիմոն Մարտիրոսեանի գլխաւորութեամբ կազմակերպուեցաւ բժշկական պարագաներու տեղափոխումն ու դատարկումը Սիսիանի բժշկական կեդրոն: Կեդրոնի տնօրէն Անիկ Գրիգորեանը իր խորին շնորհակալութիւնը յայտնեց բարեգործական կազմակերպութիւններու տնօրէնութեան, հաստատելով որ անոնց անհրաժեշտութիւնը ունէր հիւանդանոցը եւ վստահեցուց, որ անոնք կը գործածուին Սիսիանի համայնքի բնակչութեան անոնց առողջութեան՝ բուժման եւ ապաքինման համար: Իր խօսքերով այս մեծ աջակցութիւնը նոր ոգեւորութիւն եւ ոյժ կը փոխանցէ բուժանձնակազմին, նոր բժշկական պարագաներով զինուելով եւ նորանոր բժշկական յաջողութիւններու հասնելու համար:
«Սիսիանի բժշկական կեդրոնը» ՓԲԸ-ի կազմը անսահման երախտապարտ է Ձեզի, Ձեր ցուցաբերած աջակցութեան համար: Ձեզի կը վստահեցնենք, որ Ձեր տրամադրած օգնութիւնը կը ծառայէ Սիսիանի ազգաբնակչութեան բուժսպասարկման որակի բարելաւման գործին:»
Յարգանքներով՝ Անիկ Գրիգորեան
